samarkandnews.uz – халқ депутатлари Самарқанд шаҳар кенгаши ва шаҳар ҳокимлигининг «Samarqand» газетаси раcмий веб-сайти

Экстремизмга қарши қонун

Чоп этиш

унинг моҳияти ва аҳамиятини биласизми?

Жорий йилнинг 30 июлида Ўзбекистон Республикаси Президенти томонидан имзоланган "Экстремизмга қарши курашиш тўғрисида"ги қонуннинг мақсади экстремизмга қарши курашиш соҳасидаги муносабатларни тартибга солишдан иборатдир.

Унинг мазмун-моҳияти ва аҳамиятига эътибор қаратадиган бўлсак, мамлакатимизда диний экстремизм ва терроризмнинг олдини олиш билан боғлиқ бўлган қуйидаги чора-тадбирлар белгиланган:

экстремистик фаолиятни амалга оширишга йўл қўймаслик тўғрисида расмий огоҳлантириш чиқариш;

юридик шахс томонидан экстремистик фаолият амалга оширилишига йўл қўймаслик тўғрисида тақдимнома киритиш;

экстремистик материалларни олиб кириш, тайёрлаш, сақлаш, тарқатиш ва намойиш этишни тақиқлаш;

экстремизмни молиялаштиришни тақиқлаш;

юридик шахснинг фаолиятини тўхтатиб туриш;

ташкилотни экстремистик ташкилот, деб топиш.

Экстремистик фаолият белгиларини ўз ичига олган, тайёрланаётган ғайриқонуний ҳаракатлар тўғрисида етарлича ва аввалдан тасдиқланган маълумотлар мавжуд бўлган ҳамда жавобгарликка тортиш учун асослар мавжуд бўлмаган тақдирда, экстремизмга қарши курашиш бўйича фаолиятни амалга оширувчи давлат органининг мансабдор шахси экстремизмнинг юзага келишига йўл қўяётган мансабдор шахсларга ва жисмоний шахсларга бундай фаолиятга йўл қўймаслик тўғрисида ёзма шаклда расмий огоҳлантириш чиқаради, огоҳлантиришда уни чиқаришнинг аниқ асослари кўрсатилиши лозим.

Шунингдек, юридик шахслар фаолиятида экстремизм белгилари аниқланса, прокурор ёки ваколатли мансабдор шахс қонунбузарликка йўл қўймаслик тўғрисида тақдимнома киритади. Белгиланган муддатда қонунбузарликлар бартараф этилмаса юридик шахснинг фаолияти суднинг қарори билан олти ойгача бўлган муддатга тўхтатиб турилади ёки Ўзбекис­тон Республикаси Олий судининг қарори билан тақиқланади.

Шунингдек, экстремизмни молиялаштириш ҳам тақиқланади. Муайян ташкилотни экстремистик ташкилот, деб топиш суд тартибида амалга оширилади.

Экстремистик ташкилотларнинг рўйхати Адлия вазирлиги ва Олий суднинг расмий веб-сайтларида эълон қилинади.

Фуқаролар, чет эл фуқаролари ва фуқаролиги бўлмаган шахслар экстремистик фаолиятни амалга оширганлик учун жавобгарликка тортилади.

Ўзбекистон Республикасидан ташқарида рўйхатга олинган минтақавий, халқаро ёки хорижий ташкилот Олий суд томонидан экс­тремистик ташкилот деб топилган тақдирда, Ўзбекистон Республикаси ҳудудида мазкур ташкилотнинг  фаолияти тақиқланади ҳамда бу ташкилот тугатилади. Унга  тегишли бўлган мол-мулк эса мусодара қилинади ҳамда давлат мулкига ўтказилади.

Ушбу қонун расмий эълон қилинган кундан эътиборан уч ой ўтгач кучга киради.

Бир сўз билан айтганда, мазкур қонун мамлакатда экстремизмга қарши курашнинг мустаҳкам ҳуқуқий асосини белгилаб берди. Зеро, бугунги даврда кимлигимиз ва қандай мавқега эга бўлишимиздан қатъи назар, ҳар биримизнинг вазифамиз экстремизм ва терроризмнинг қабиҳ ва ғаразли жинояткорона мақсад ва моҳиятини ёшларимиз, бутун халқимиз орасида тинимсиз фош қилиш асосида огоҳликка чақиришдан иборатдир.

Муаллиф: Пўлат АҲМЕДОВ, шаҳар адлия бўлими бошлиғи

6.10.2018 20 78 Жамият ва ҳуқуқ
окна фотограф html php памятники знакомства